يَه عمرَ آدمي تي پا بَنيشتم
غمه، مي زيندگي اَمره بَريشتم
پيرابوم، بَس نيه چشم انتظاري
بَليتم، نيمه جانابوم، بَبيشتم
( ناصر فرهاديان )
*
چَقَد تلخه غريبي در ولايت
غمام دئنه مي دستَ جي شكايت
بيئن مردم، مي دور و بر جمابين
شنيدن دونه خيلي مي حكايت
( خويشتن دار لنگرودي )
*
بَشوي عمري، بَبوم واخوب مو كم كم
تموم عمر مو ايسّه همش غم
عجب بختي امو دَئشتيم خداجون
يه روزَ روزيگارَن مِه نَبو چَم!
( داوود خاني خليفه محله )
*
مي تسكه ديل غريبي مئن بَگود گير
نَگيته خاشخا آخر مي سَروير
غم دوري جي هر جا با بَئنَم مو
غريبي تير بومَه مي قلبَ سر جير
( داوود خاني خليفه محله )
*
گوتَم دامون بَشيم، دامون نومِه تو
گوتم لاجون بَشيم، لاجون نومه تو
ندونَسم تو اَندي كس مَسازي
كه هر جايي گوتم، آسون نومه تو
( داوود خاني خليفه محله )
*
بيه بانو، بيه مي جونَ بانو!
سراجيرابو مي چوشمانَ اَرسو
نه روز آروم دَئنم، نه شؤ قراري
بَبوم از غوصه ي دونيا ژَگَر چو
( داوود خاني خليفه محله )
**
روخونه لب ستاره زئنه سوسو
ندونم تسكه ديل چي خئنه از مو
در اي دونيا سليم هم يار دئنه
الاتي تي بگو آخه مي يار كو؟
( حسنعلي محمودي )
*
اَمه را گرچه از همديگه دوره
به تي دوري مي ديل خيلي صبوره
بشوم خَ دورابوم از شهر لاجون
قديمئن بد نوتن كه دور " نوره "
( حسين وثوقي )
*
اَمِه مئن تووادان هَندِه جدايي
كورا بَشوّ اَمِه او آشنايي!
يه روز هنده رَسَنه كه دوباره
بَبيم همديگره واسِه فدايي؟
( حسين وثوقي )
*
وختي خوسنم، تره اينم خواب ميان
بيداربونم، چوشمَ اينم آبَ ميان
نه خواب دئنم تي واسه نه بيداري
حيرانمه آخه ماه و آفتاب ميان
( سيد علي مير باذل )
*
تي دوري، دُكشانه مي چوشمَ سويه
تي غم زرداگوداي، مي رنگ و رويه
ولي با اين همه درد و شكايت
تي اَمرا بون، همش مي آرزويه
( محمد دعايي )